Tetë shtete të BE-së bllokojnë hapjen e Kapitullit 3 për Serbinë

BRUKSEL — Tetë shtete anëtare të Bashkimit Evropian bllokuan hapjen e Kapitullit 3 në negociatat e anëtarësimit të Serbisë me BE-në, pas mospajtimit në takimin e ambasadorëve në Bruksel. Holanda, Suedia, Finlanda, Belgjika, Estonia, Lituania, Bullgaria dhe Kroacia refuzuan të mbështesin propozimin, ndërsa çdo kapitull negociues kërkon miratimin unanim të 27 vendeve anëtare.

Tre vende të tjera — Danimarka, Luksemburgu dhe Letonia — nuk e kundërshtuan hapur propozimin, por vlerësuan se Serbia ende nuk i ka përmbushur kushtet e kërkuara. Franca, siç raportoi Euronews, ishte ndër vendet që shtyu për hapjen e kapitullit në favor të palës serbe.

Kapitulli 3 mbulon konkurrueshmërinë, rritjen gjithëpërfshirëse dhe përafrimin e ekonomisë serbe me tregun e vetëm evropian. Vendimi përbën një "goditje" për Komisionin Evropian, i cili prej vitesh argumenton se Serbia i ka përmbushur kushtet teknike për hapjen e këtij kapitulli, pavarësisht kundërshtimeve politike të shteteve anëtare.

Sipas diplomatëve evropianë, kundërshtimet e tetë vendeve lidhen kryesisht me problemet në sundimin e ligjit dhe mosharmonizimin e Serbisë me sanksionet perëndimore ndaj Rusisë. Një diplomat tha se, me "një grup kaq të madh shtetesh që kundërshtojnë për çështje kaq themelore", propozimi vështirë se do të rikthehet shpejt në tryezë.

Komisionerja për Zgjerim, Marta Kos, mbrojti sërish hapjen e Kapitullit 3, duke thënë në Parlamentin Evropian se "në dritën e disa zhvillimeve të fundit pozitive, Komisioni ka rinovuar rekomandimin ndaj Këshillit". Ajo shtoi se Komisioni do të vazhdojë të nxisë përparimin e reformave në dobi të qytetarëve dhe shoqërisë serbe.

Ndërkohë, Parlamenti Evropian miratoi raportin për zgjerimin e Serbisë me 468 vota pro, 116 kundër dhe 79 abstenime, duke kërkuar reforma në sistemin zgjedhor dhe forcimin e pavarësisë së gjyqësorit. Raportuesi Tonino Picula tha se vendi ka shënuar përkeqësim: "Reformat janë ndalur dhe ritmi i tyre është ngadalësuar".

Serbia aplikoi për anëtarësim në BE në 2009-n dhe fitoi statusin e vendit kandidat në 2012-n. Deri tani janë hapur 22 kapituj negociues dhe vetëm dy janë mbyllur përkohësisht; kapitulli i fundit u hap në fund të vitit 2021, ndërsa procesi mbetet i bllokuar prej katër vitesh për shkak të mungesës së konsensusit politik mes vendeve anëtare.

Burim: Nacionale
— Redaksia ZHURMA