Dy drejtues të FIFA-s akuzojnë Infantinon për shitjen e fshehtë të Botërorit

ZYRIH — Një përplasje e paprecedentë ka tronditur themelet e qeverisë botërore të futbollit. Këshilltari i Lartë i FIFA-s, Carlos Cordeiro, dhe Drejtori i Operacioneve, Kevin Lamour, kanë dalë publikisht kundër presidentit Gianni Infantino, duke e akuzuar atë për mashtrim dhe vendimmarrje autokrate lidhur me një plan të fshehtë për shitjen e një pjese të aksioneve të Kupës së Botës te fondet e kapitalit privat.

Administrata u mashtrua nga një njeri i vetëm, thotë Drejtori i Operacioneve, Kevin Lamour, duke sugjeruar që projekti kontrovers i pezullohet menjëherë. Ai u shpreh se punonjësit janë “mashtruar” nga mungesa e transparencës së Infantinos gjatë muajve të fundit dhe se ata “meritojnë më shumë sesa përbuzje dhe frikësim”.

Projekti parashikon krijimin e një dege komerciale me vlerë 20 miliardë dollarë, e mbështetur nga një fond investimi në Nju-Jork, i drejtuar nga Joshua Kushner. Qëndrimi i Cordeiro-s: “Nuk mund të rri duarkryq ndërsa FIFA shqyrton shitjen e një pjese të aksioneve të Kupës së Botës. Nuk kam pasur asnjë përfshirje në këtë propozim dhe e kundërshtoj fuqimisht; është një marrëveshje e keqe për futbollin”.

Lamour u shpreh i vetëdijshëm se kjo deklaratë mund t’i kushtojë vendin e punës, duke i bërë një sfidë të hapur presidentit të FIFA-s: “Kam një detyrim besnikërie ndaj punëdhënësit tim, por mbi të gjitha kam detyrim ndaj vlerave, edukimit tim dhe kolegëve të mi. Nëse kjo do të thotë të humbas punën, le të jetë kështu. Do ta kuptoj dhe do ta respektoj atë vendim. Të paktën sonte do të fle i qetë”.

Deklarata shpërthyese e Lamour erdhi vetëm pak orë pas dorëheqjes së Carlos Cordeiro-s, Këshilltarit të Lartë të Infantinos. Cordeiro, një ish-bankier i Goldman Sachs dhe ish-president i Federatës Amerikane të Futbollit, u bëri thirrje zyrtarëve të tjerë të flasin hapur kundër kësaj marrëveshjeje.

Burim: Top Channel

— Redaksia ZHURMA