TV 2 danez i kërkon falje komedianit Rasmus Walbridge pas katër muajsh kamerë të fshehtë

Televizioni danez TV 2 i kërkoi zyrtarisht falje komedianit Rasmus Walbridge më 31 tetor 2026, pasi ai u mashtrua për katër muaj rresht nga 149 persona në një projekt me kamera të fshehta. Walbridge kishte pranuar një ofertë pune duke besuar se po realizonte filmin e tij të ëndrrave, ndërsa në të vërtetë ishte pjesë e emisionit “Everyone Loves Rasmus”.

E gjithë ngjarja solli krahasime të menjëhershme me filmin e vitit 1998 “The Truman Show”. Në atë prodhim kinematografik, personazhi kryesor i luajtur nga Jim Carrey jeton pa e ditur në një botë artificiale ku miqtë, familjarët dhe fqinjët janë aktorë, ndërsa çdo çast i jetës së tij transmetohet live për publikun. Me nisjen e transmetimit në Danimarkë, shikuesit reaguan ashpër duke e cilësuar formatin si ngacmim dhe manipulim psikologjik që tejkalonte kufijtë e një shakaje.

Sipas medias British Mirror, në këtë strukturë mashtrimi u angazhua një grup prej 149 personash, ku përfshiheshin miqtë më të afërt të komedianit, të njohur, aktorë si dhe profesionistë të industrisë televizive. Për katër muaj rresht, secili prej tyre ruajti sekretin dhe luajti rolin e caktuar që Walbridge të mos dyshonte. Për shkak të këtij përkushtimi ndaj projektit që e mendonte të vërtetë, komediani kaloi periudha të gjata larg familjes, në një kohë kur kishte edhe një fëmijë të porsalindur me partneren e tij.

Pasi i gjithë mashtrimi u zbulua, komediani Walbridge nuk e priti mirë të vërtetën dhe zgjodhi të tërhiqet nga vëmendja publike, sipas raportimit të medias britanike. Pas reagimeve të shumta dhe kërkesave nga publiku në rrjetet sociale për ndërprerjen e menjëhershme të programit, televizioni TV 2 mori vendimin ta hiqte përfundimisht emisionin “Everyone Loves Rasmus” nga transmetimi televiziv dhe nga platforma e vet online.

Regjisori i programit u shpreh në mbrojtje të konceptit duke thënë se një psikolog e kishte ndjekur projektin gjatë të katër muajve për të shmangur dëmtimet psikologjike dhe se Walbridge kishte marrë mbështetje edhe pasi mësoi të vërtetën. Drejtuesit e produksionit pretenduan se komediani kishte mundësi të mos lejonte publikimin e pamjeve pasi u informua për mashtrimin. Nga ana tjetër, drejtuesit e televizionit TV 2 deklaruan gjatë faljes zyrtare se produksioni nuk e kishte mbrojtur mjaftueshëm komedianin dhe se situata nuk duhej të kishte arritur deri në atë pikë.