Ford prezanton Mustang Fastback 1966 me motor V8 në SEMA 2026

Në panairin SEMA 2026, Ford ka shfaqur Ford Racing R125, një Mustang Fastback të vitit 1966 të pajisur me motor modern V8, i cili vjen si homazh për fitoren e Henry Fordit në një garë automobilistike më 1901. Suksesi i arritur në atë kohë i parapriu krijimit të kompanisë Ford Motor Company 125 vjet më parë, duke shërbyer si frymëzim për këtë model të veçantë.

Historikisht, zhvillimi i markës amerikane ka qenë i lidhur ngushtë me inovacionin në garat automobilistike dhe zgjerimin e gamës së automjeteve për publikun e gjerë. Ky projekt i ri ndjek të njëjtën filozofi, duke sjellë një qasje ndryshe nga automjetet tradicionale të ekspozitave.

Sipas të dhënave të bëra publike, projekti R125 nuk është ndërtuar vetëm për t'u fotografuar apo për të qëndruar si objekt muzeal në panair, por është krijuar për t'u përdorur në praktikë. Siç transmeton Telegrafi, ky qëllim ka udhëhequr përzgjedhjen e pjesëve, duke filluar nga blloku i motorit e deri te transmisioni, për t'u siguruar që pronarët mund ta shfrytëzojnë automjetin në përditshmëri pa hasur në vështirësi mirëmbajtjeje.

Përmes kësaj nisme, kompania kërkon të tregojë se një Mustang klasik mund të modernizohet me komponentë të disponueshëm dhe të lehtë për t'u mirëmbajtur, duke shmangur shpenzimet e mëdha që zakonisht shoqërojnë një restaurim të plotë modern. Synimi nuk ka qenë arritja e një fuqie ekstreme, por ofrimi i një zgjidhjeje më të përballueshme për entuziastët e automobilave klasikë.

Për këtë qëllim, ndërtuesit kanë përdorur pjesë që mund të blihen drejtpërdrejt nga katalogu i Ford Racing Parts. Motori, sistemi i injektimit të karburantit dhe transmisioni gjenden të gjitha në këtë katalog, çka do të thotë se edhe ndërtues të tjerë mund të realizojnë një makinë të ngjashme pa kërkuar komponentë të rrallë ose pjesë që nuk prodhohen më.

Kjo qasje dallon ndjeshëm nga projektet tepër të kushtueshme që marrin zakonisht vëmendje në panairin SEMA. Ford e paraqet këtë automjet si një alternativë më ekonomike ndaj restomod-eve luksoze, ku përfshihet modeli Revology Boss 429, duke ruajtur pamjen e jashtme klasike të Mustangut ndërkohë që mekanika përditësohet tërësisht.

Në pjesën e jashtme, silueta e njohur e Mustang Fastback të vitit 1966 ka mbetur e paprekur, ndërsa ndërhyrjet më të rëndësishme janë përqendruar poshtë karrocerisë. Motori V8 ka një vëllim prej 347 inç kub, që i bie rreth 5.7 litra, dhe mbështetet në bllokun klasik të motorëve të vegjël të prodhuesit, me një arkitekturë të ngjashme me atë të modelit Boss 302 dhe lartësi prej 8.2 inç.

Falë kokave të cilindrave prej alumini, motori prodhon 360 kuaj fuqi dhe një çift rrotullues prej 400 lb-ft, respektivisht rreth 542 Nm. Karburatori tradicional është zëvendësuar nga sistemi elektronik i injektimit Edelbrock Pro-Flo, i cili mundëson ndezje më të qëndrueshme në kushtet e temperaturave të ulëta.

Fuqia e motorit kalon nëpërmjet një transmisioni manual TREMEC TKX-600 me pesë shpejtësi. Sipas Fordit, ky model ndërron marshet më butë dhe shfaq qëndrueshmëri më të lartë se modeli më i vjetër TREMEC TKO që zëvendëson.

Përmasat kompakte të transmisionit të ri kanë lejuar instalimin e tij në dyshemenë origjinale të Mustangut duke kërkuar vetëm modifikime minimale. Ky ndryshim nuk kërkon as prerje dhe as saldim të dyshemesë, duke ulur ndjeshëm koston e punës dhe duke e bërë projektin më të realizueshëm për entuziastët që nuk disponojnë punishte profesionale.

Përmes këtij koncepti, kompania synon të dëshmojë se automjetet klasike ruajnë identitetin e tyre origjinal ndërkohë që përfitojnë nga teknologjitë bashkëkohore.