Të rinjtë nga diaspora vizitojnë Universitetin e Tetovës
Pjesëmarrësit e programit OriginAL u pritën në Universitetin e Tetovës në kuadër të nismave për forcimin e lidhjeve me vendet e origjinës.
Redaksia ZHURMA · · 1 min lexim
TETOVË — Universiteti i Tetovës mirëpriti një grup të rinjsh shqiptarë nga diaspora, të cilët marrin pjesë në programin OriginAL, një iniciativë e themeluar në vitin 2022 nga GERMIN dhe Global Albanians Foundation. Qëllimi i këtij programi është forcimi i lidhjeve mes brezave të rinj dhe vendeve të origjinës përmes përvojave kulturore, edukative dhe vullnetare.
Gjatë kësaj vizite, delegacioni u prit nga Rektori i Universitetit të Tetovës, Prof. Dr. Kushtrim Ahmeti, së bashku me Prorektorin për Shkencë, Prof. Dr. Agon Memeti, dhe kryetarin e Kuvendit Universitar të Studentëve, Gent Kurtishi. Rektori Ahmeti theksoi para të pranishmëve se institucioni lindi si rezultat i sakrificave të shumta gjeneratave për të siguruar të drejtën e arsimit të lartë në gjuhën shqipe.
Veprimtaria vijoi në Fakultetin Filozofik, ku dekania Prof. Dr. Sheruze Osmani-Ballazhi dhe prodekania për arsim Prof. Dr. Fitore Bajrami shfaqën dy materiale video për sfidat dhe rrugëtimin ndër vite të këtij universiteti. Studentja Nurije Musaj ndau me të pranishmit përvojën e saj akademike, ndërsa studentët patën mundësinë të diskutojnë rreth programeve studimore dhe jetës studentore. Organizata “Loja” nga Tetova kontribuoi si partnere në realizimin e kësaj vizite.
