Studenti i Mjekësisë: Kam humbur nënën nga kanceri, në Onkologjik ka mungesa

Një student i sapodiplomuar në Mjekësi të Përgjithshme ka shprehur solidaritetin e tij për protestën e studentëve, ku kërkoi dorëheqjen e kryeministrit Edi Rama dhe denoncoi mungesën e trajtimeve e kimioterapive në Onkologjik, duke rrëfyer se ka humbur nënën e tij nga kanceri i gjakut.

Gjatë qëndrimit të tij në protestë, i riu kritikoi reagimin e mazhorancës dhe të kryeministrit ndaj lëvizjes studentore. Ai theksoi se për më shumë se 130 ditë me revolucionin e flamingove, protesta paqësore e studentëve është përballur me përbuzje dhe është cilësuar si e dhunshme nga pushteti, pa u adresuar asnjë nga problematikat e ngritura prej tyre.

Duke folur për përvojën e tij personale, mjeku i ri u përlot teksa tregoi se prej shtatë muajsh e mundon mendimi se çfarë mund të kishte bërë ndryshe për nënën e tij. Ai deklaroi se ndien që nuk ka mundur të bëjë maksimumin për të, për shkak të mungesave të theksuara në shërbimin onkologjik dhe në ilaçet për kimioterapi.

Sipas të riut, kriza e trajtimeve shëndetësore dhe mosadresimi i kërkesave studentore tregojnë se mazhoranca nuk ka përmbushur detyrimet e saj, prandaj është krijuar nevoja për dorëheqjen e kreut të qeverisë.

«Unë jam i sapodiplomuar për mjekësi të përgjithshme, ky ishte solidaritet që mund të ofrojmë sepse kemi parë për mbi 130 ditë me revolucionin e flamingove pame edhe lëvizjen e studentëve që u cilësuar si e dhunshme, por pamë një përbuzje që është ende sot nga pjesa e mazhorancës dhe në veçanti nga kryeministri. Nuk janë adresuar problematikat që studentët ngrenë. Ka ardhur momenti që të kërkojmë dorëheqjen e kryeministrit, jemi në këto problematika sepse kjo mazhorancë nuk e ka bërë atë që duhet të bënte… Kemi problematikën e Onkologjikut, unë timë më e kam humbur nga kanceri i gjakut dhe nuk e ndjej që kam bërë maksimumin ndaj saj, sepse ka shumë mungesa në pjesë e trajtimeve dhe kimioterapitë që ofrohen», tha ai.