PDK thërret në interpelancë ministrin Arben Vitia pas vdekjes së pacientes

Deputetja e Partisë Demokratike të Kosovës, Sala Jashari, ka protokolluar kërkesën për interpelancë ndaj ministrit të Shëndetësisë, Arben Vitia, pas raportimeve për vdekjen e një pacienteje me kancer. Kjo kërkesë parlamentare vjen lidhur me mungesën e medikamenteve kryesore në Klinikën e Onkologjisë, ku kostoja e barnave arrin deri në 1 mijë e 800 euro.

Më parë, organizata “Renesansa” kishte bërë me dije se një paciente me kancer të avancuar të gjirit kishte ndërruar jetë pasi kishte mbetur rreth katër muaj pa terapinë e nevojshme Palbociclib. Sipas kësaj organizate, gjatë periudhës së mungesës së barit dhe pamundësisë financiare të familjes për ta blerë vetë, pacientes i mekoheshin metastaza të reja në tru. Bari Palbociclib bën pjesë në Listën Esenciale të Barnave, por çmimi i tij shkon deri në 1 mijë e 800 euro për ata që detyrohen ta sigurojnë vetë. Mungesa të ngjashme në Onkologji janë evidentuar edhe për medikamente të tjera si Avastina, Pembrolizumabi dhe Dabrafenibi, duke rënduar xhepat e pacientëve.

Lidhur me procedurat, deputetja Sala Jashari njoftoi se kërkesa e saj tashmë është protokolluar zyrtarisht në Kuvend. Kërkesa e dorëzuar te kryetarja e Kuvendit do t’i përcillet tutje Ministrisë së Shëndetësisë dhe Qeverisë për shqyrtim. Sipas procedurave të përcaktuara parlamentare, kryetari i Kuvendit ia dërgon kërkesën kryeministrit brenda dy ditëve nga pranimi i saj.

Lidhur me hapat e ardhshëm, Rregullorja e Kuvendit përcakton se kryeministri është i obliguar ta shqyrtojë mocionin dhe t’i përgjigjet Kuvendit brenda shtatë ditësh. Pasi të merret përgjigjja nga Qeveria, interpelanca vendoset në rendin e ditës të seancës plenare brenda një afati prej shtatë ditësh, ku Kryesia e Kuvendit përcakton datën e saktë të mbajtjes së saj. Nëse Qeveria nuk dërgon përgjigje brenda afatit shtatëditor, çështja vendoset si pikë e fundit e rendit të ditës në seancën plenare që është në zhvillim e sipër. Në rast se Kuvendi nuk është duke mbajtur seancë, ajo do të vihet si pikë e parë e rendit të ditës në seancën e radhës, pasi Kuvendi nuk mund ta refuzojë vënien e saj në rend dite nëse plotësohen kushtet formale.

Deputetja Sala Jashari konfirmoi se kjo iniciativë synon hapjen e diskutimit parlamentar dhe kërkimin e përgjegjësisë nga institucionet shëndetësore për menaxhimin e furnizimit me barna.