Rama: Protesta në Tiranë u financua nga krimi i organizuar dhe paratë e huaja

TIRANË — Kryeministri Edi Rama deklaroi se protesta që po mbahet prej 10 ditësh në Tiranë është financuar nga krimi i organizuar dhe paratë e ardhura nga jashtë vendit prej forcave të huaja. Ai tha se Policia e Shtetit disponon të dhëna për futjen e maskave dhe lëndëve shpërthyese përmes doganës, si dhe për organizimin e grupeve të dhunshme.

Protestat në kryeqytet nisën në mënyrë paqësore nën simbolikën e flamingove me kërkesa që konsideroheshin legjitime, por situata u përshkallëzua në përplasje të dhunshme mes protestuesve dhe forcave të rendit. Studentët kanë kërkuar largimin dhe dorëheqjen e kryeministrit, ndërsa gjatë ditës së djeshme dhuna nisi pranë Ministrisë së Arsimit. Gjatë përplasjeve të zhvilluara në kryeqytet, bilanci i të lënduarve shënoi dy punonjës policie të plagosur për çdo protestues të dëmtuar.

Sipas kryeministrit Rama, të dhënat e grumbulluara nga policia tregojnë se përshkallëzimi i dhunës është përgatitur prej disa muajsh, duke nisur nga koordinimi në rrjete sociale e deri te futja e materialeve eksplozive. Rama tha se policia ka në duar informacionet për grupet që veprojnë si pjesë e rrjetit Antifa, të cilin ai e cilësoi si rrjet të terrorit urban që vepron në emër të anarkisë, komunizmit dhe antikapitalizmit. Po ashtu, kreu i qeverisë deklaroi se autoritetet kanë identifikuar një pjesë të pjesëmarrësve në këtë dhunë. Rama pretendon se Partia Demokratike mori autorësinë e nisjes së dhunës pranë Ministrisë së Arsimit, ndërsa kritikoi pasqyrimin mediatik për krijimin e një perceptimi të rremë lidhur me dhunën policore ndaj studentëve.

Akuzat e bëra publike për financimin nga krimi i organizuar, ndërhyrjen e forcave të huaja dhe përfshirjen e rrjetit Antifa mbeten pretendime të kryeministrit, të cilat në deklaratën e tij nuk u shoqëruan me prova konkrete të publikuara.

Rama theksoi se liria për të protestuar është një e drejtë e padiskutueshme e çdo qytetari, ndërsa e cilësoi dhunën si një krim të pajustifikueshëm. «Përshkallëzimi është përgatitur prej muajsh, të dhënat për futjen e maskave dhe lëndëve eksplozive përmes doganë janë në duart e policisë, të dhënat e organizimit të grupeve si pjesë e Antifa janë në duart e policisë, por në duart e policisë janë edhe pjesëmarrësit apo më saktë një pjesë e tyre në këtë dhunë të financuar nga krimi i organizuar dhe para e ardhur nga jashtë ku padyshim glasa mbi tortë është PD që dje mori autorësinë e nisje së dhunës te Ministria e Arsimit», deklaroi ai.