SPAK dërgon në gjyq katër persona për pastrim parash përmes shoqërive fiktive

TIRANË — Prokuroria e Posaçme kundër Korrupsionit dhe Krimit të Organizuar ka dërguar për gjykim katër persona, të akuzuar për pastrim parash dhe pjesëmarrje në grup të strukturuar kriminal, përmes tre shoqërive tregtare fiktive. Të pandehurit janë Domingo Romillo Iriarte, Mihaela Munteanu Manole, Alvaro Romillo Castillo dhe Doris Pere.

Hetimet zbuluan se shoqëritë "Wingwort", "Wortnova" dhe "Wortend" u regjistruan në qershor 2024 me kapital minimal, të gjitha në të njëjtën adresë. Asnjëra prej tyre nuk zhvilloi veprimtari ekonomike reale — sipas SPAK, ato u përdorën si mekanizma për futjen e fondeve me origjinë të dyshuar kriminale në ekonominë formale.

Prokuroria thotë se janë evidentuar transaksione bankare me vlera të konsiderueshme, fatura të dyshuara si fiktive, pagesa pa dokumentacion justifikues dhe transferta ndërkombëtare drejt subjekteve të huaja. Shoqëria "Wortend" realizoi qarkullime financiare që nuk përputheshin me aktivitetin e deklaruar, me kreditime bankare më të larta se vlera e faturave.

Një pjesë e fondeve u përdor për blerjen e dy pronave në zonën e Dhërmiut, me sipërfaqe totale 23.16 hektarë, për një vlerë të deklaruar prej 1.62 milionë eurosh. Nga ekspertimi rezultoi se vlera reale e tregut të pronave ishte më e lartë se ajo e deklaruar në kontratat e shitblerjes.

Sipas SPAK, Domingo Romillo Iriarte kishte rolin drejtues dhe organizues të skemës, duke administruar kompanitë, orientuar qarkullimin e fondeve dhe vendosur për investimet. Mihaela Munteanu Manole dhe Alvaro Romillo Castillo dyshohet se kontribuan në krijimin e fasadës së ligjshme përmes roleve të tyre në "Wortnova" dhe "Wortend".

Doris Pere akuzohet se ndihmoi funksionimin e skemës përmes veprimeve administrative, bankare dhe organizative në Shqipëri, përfshirë sigurimin e adresave të kompanive dhe kryerjen e pagesave në emër të tyre. Mbi pasuritë e Domingo Romillo Iriarte, Alvaro Romillo Castillo dhe Mihaela Munteanu Manole, SPAK vendosi masën e sigurimit pasuror "sekuestro preventive".

Sipas SPAK, autoritetet gjyqësore të Spanjës kanë siguruar informacion se disa të pandehur janë subjekt hetimi edhe për vepra penale të mashtrimit. Tre nga të pandehurit akuzohen sipas neneve 287, 28/4, 333/a dhe 334 të Kodit Penal, ndërsa Doris Pere akuzohet sipas nenit 287/2.

Burim: BalkanWeb, ATSH, Euronews Albania, Ora News
— Redaksia ZHURMA