SPAK godet me 20 masa arresti grupet e Artur Shehut dhe Luçiano Koçekut
Si pastroheshin paratë e kokainës së Amerikës Latine në resortet luksoze të jugut?
TIRANË — SPAK ka goditur një organizatë të madhe kriminale, duke firmosur 20 masa sigurie për trafikim kokaine dhe pastrim parash. Me vendim të prokurorëve Altin Dumani dhe Elida Kaçkini, janë lëshuar 15 urdhra arresti me burg dhe 5 me arrest shtëpie për të dyshuarit, përfshirë narkotrafikantë të njohur dhe disa biznesmenë shqiptarë.
Në mesin e personave nën hetim është Artur Shehu, i cili jeton prej tre dekadash në Shtetet e Bashkuara të Amerikës dhe dyshohet për skemën e tjetërsimit të pronave në Zvërnec. Ndërkohë, në kërkim ndërkombëtar është shpallur Artur alias Luçiano Koçeku, i cili e drejton grupin e trafikut të drogës nga baza e tij në Dubai.
Sipas dosjes hetimore, ky rrjet kriminal siguronte kokainë nga vendet e Amerikës Latine, si Kolumbia, Ekuadori, Bolivia, Surinami, Paraguai, Uruguai, Porto Riko dhe Brazili, për ta transportuar drejt Europës. Fitimet e stërmëdha të siguruara nga shitja e drogës në tregjet europiane më pas transferoheshin për t'u pastruar në sektorin e ndërtimit, duke përfshirë kulla dhe resorte luksoze në jug të Shqipërisë.
Për pastrim parash po hetohet Ilir Shtufi, i cilësuar si njeriu i Koçekëve që investonte në ndërtim, ndërsa u arrestua biznesmeni Orest Sota. Një tjetër grupim brenda këtij rrjeti drejtohej nga Renato Hamzai, një lidhje e afërt e Artur Shehut, i cili kishte marrë pjesë edhe në takimin e organizuar mes bosëve të krimit në Aruba.
Shehu dyshohet se pastronte paratë përmes vëllezërve Erion dhe Adrian Rama, nipat e Fatmir Ramës, si dhe Leonard Bishajt. Gjithashtu, në pranga përfundoi Orgest Birçaj, pronar i kompanisë "Top Seven", ndërsa Edmond Jaupi u la në arrest shtëpie pas sekuestrimit të miliona eurove pasuri nga ana e SPAK-ut.
Burim: Almakos
— Redaksia ZHURMA