SPAK lëshon 20 masa arresti për trafik droge dhe pastrim parash
Si janë lidhur biznesmenët e sektorit të ndërtimit me grupin e strukturuar kriminal nën hetim të SPAK?
TIRANË — SPAK, në bashkëpunim me Policinë e Shtetit, po zhvillon një operacion të gjerë që ka nisur në orët e para të mëngjesit të 12 qershorit. Janë lëshuar 20 masa sigurie ndaj personave të dyshuar për trafikim të lëndëve narkotike dhe pastrim të parave të gjeneruara nga veprimtaria e grupit kriminal.
Mes personave nën hetim, gjykata ka vendosur masën "arrest me burg" për biznesmenin O. S., i cili ishte pyetur më parë në kuadër të dosjes së AKSHI. Masa e sigurisë ndaj tij është ekzekutuar nga autoritetet, ndërsa ai dyshohet se bën pjesë në grupin e strukturuar kriminal.
Masat "arrest me burg" janë vendosur gjithashtu për A. Sh. dhe I. Sh., por ende nuk janë ekzekutuar pasi dyshohet se të dy ndodhen jashtë vendit. Skema e dyshueshme lidhet me pastrimin e parave të gjeneruara nga sektori i ndërtimit, brenda kuadrit të grupit kriminal.
Operacioni është ende në zhvillim. SPAK pritet të japë detaje shtesë mbi rezultatet e hetimit dhe rolin e secilit prej personave të implikuar në dosje, ndër akuzat e të cilëve renditen trafikimi i drogës dhe pastrimi i parave.
Burim: Klan Kosova
— Redaksia ZHURMA