Drafti i KE-së: Kosova pa përparim, Mali i Zi drejt fundit të negociatave

Kosova, Serbia dhe Bosnje e Hercegovina nuk kanë shënuar përparim në fushat themelore, sipas draftit të komunikatës vjetore të Komisionit Evropian për politikën e zgjerimit. Dokumenti vlerëson se përparimi i vendeve të rajonit mbetet i pabarabartë, ndërsa fushat themelore përfshijnë sundimin e ligjit, institucionet demokratike, reformën e administratës publike dhe kriteret ekonomike. Për Kosovën, si arsye e mungesës së progresit përmenden kriza e vazhdueshme politike dhe mungesa e një Kuvendi funksional që kanë penguar punën e qeverisë.

Në krahun tjetër, Mali i Zi përshkruhet si vendi që prin në procesin e zgjerimit dhe mund t'i përfundojë negociatat për anëtarësim në dhjetor të vitit 2026. Podgorica i ka përmbushur kriteret përfundimtare në të gjithë kapitujt e negociatave dhe ky mund të jetë raporti i fundit i rregullt për këtë vend, pasi nga viti i ardhshëm pritet të zëvendësohet me raporte monitorimi. Për Serbinë, drafti përmban vlerësime kritike për sundimin e ligjit dhe lirinë e shprehjes, duke vënë njoftim edhe për rrezikun e kapjes së shtetit.

Raporti për Kosovën përfshin për herë të parë edhe përshtatjen me politikën e jashtme të BE-së, ku Komisioni pritet të përshëndesë faktin se vendi është përshtatur plotësisht në këtë fushë. Njëkohësisht, për shkak të proceseve politike në Kosovë dhe Serbi, nuk ka pasur progres të duhur në zbatimin e obligimeve nga dialogu dhe normalizimi i raporteve mbetet kusht për rrugëtimin evropian.