Sokol Haziri: Kërcënimet ndaj vëllezërve Haradinaj janë të papranueshme

Kryetari i Aleancës për Ardhmërinë e Kosovës në Gjilan, Sokol Haziri, ka reaguar ndaj kërcënimeve të drejtuara ndaj vëllezërve Haradinaj, duke i cilësuar ato si të papranueshme dhe të lidhura me urrejtjen ndaj Ushtrisë Çlirimtare të Kosovës. Ai u ka bërë thirrje organeve të sigurisë që të identifikojnë përgjegjësit, të zbardhin motivet dhe t'i vënë ata para drejtësisë. Haziri ka theksuar se as vëllezërit Haradinaj dhe as subjekti politik që përfaqëson nuk do të tërhiqen përballë presioneve apo kërcënimeve.

Kujtojmë se më parë Aleanca kishte dorëzuar në Polici kërcënimet për vrasjen e Haradinajve. Gjatë reagimit të tij, kreu i degës në Gjilan ka ngritur gjithashtu dyshime se zhvillimet e fundit mund të synojnë zhvendosjen e vëmendjes publike nga përgjegjësia e Qeverisë për rastin tragjik në Vitomiricë, duke kërkuar transparencë dhe përgjegjësi institucionale për krizat me të cilat po përballet vendi.