Snopçe: Precedent shqetësues në Kuvend për demokracinë

Deputeti i Aleancës për Shqiptarët, Halil Snopçe, e ka cilësuar shqetësues për funksionimin e demokracisë parlamentare atë që po ndodh në Kuvend gjatë seancës për pyetje të deputetëve. Sipas tij, opozitës i garantohet e drejta që në kohëzgjatje prej dy orësh t'i parashtrojë pyetje Qeverisë.

Snopçe ka kundërshtuar praktikën e ndërprerjes së kësaj mundësie përmes pauzave, pas së cilës arsyetohet se koha dyorëshe ka kaluar. Ai e ka quajtur këtë situatë «një lloj skizofrenie politike» dhe një interpretim absurd të Rregullores së Kuvendit. Gjatë fjalës së tij nga vendi, ai u ndërpre nga koordinatori i OBRM-PDUKM-së, duke mos arritur të shprehet deri në fund.