Sinani takon në Depcë delegacionin e Kosovës pas ndalimit në kufi

Kryetarja e Preshevës, Ardita Sinani, ka shkuar në pjesën e Kosovës dhe është takuar me delegacionin në vendkalimin kufitar në Depcë, pasi autoritetet e Serbisë nuk lejuan hyrjen e tyre në territorin serb. Delegacioni po udhëtonte për t’i shprehur ngushëllime asaj pas vdekjes së babait.

Në përbërje të delegacionit ishin deputetet e Kuvendit të Kosovës, Arbërie Nagavci, Fatmire Mullhaxha-Kollçaku dhe Liza Gashi. Ato shoqëroheshin nga ambasadori i Kosovës në Beograd, Jetish Jashari, si dhe nga Ragmi Mustafi, këshilltar i kryeministrit Albin Kurti për Preshevën, Medvegjën dhe Bujanocin, i cili kishte ardhur me porosinë e kryeministrit për të përcjellë ngushëllimet.

Ardita Sinani bëri të ditur se vizita nuk ishte paraparë si zyrtare, por kishte qëllime personale dhe humane për të ruajtur traditën e ngushëllimit në raste vdekjeje. Ajo u shpreh se ky rast dëshmon se Serbia e shfaq politikën e saj diskriminuese edhe në situata mortore kur vizitat kanë vetëm karakter njerëzor, vetëm sepse në to përfshihen zyrtarë shtetërorë të Republikës së Kosovës.

Pas mbajtjes në vendkalimin kufitar, autoritetet njoftuan delegacionin se nuk lejohet vizita në Preshevë. Sinani theksoi se kjo është një situatë për t’u mbajtur mend për të keq, duke shtuar se shpreson që Serbia të ketë marrë mesazhin e qartë se nuk do t’ia dalë të ndajë njerëzit as në rrethana të tilla.