Si u kapën armët dhe cigaret kontrabandë në Portin e Durrësit?
Policia arreston një person dhe procedon përgjegjësin e hotelerisë së tragetit pas sekuestrimit të një AK-47 dhe 798 steka cigare në Durrës.
DURRËS — Policia e shtetit ka goditur dy raste të tentativës për të futur mallra kontrabandë në Shqipëri përmes Portit të Durrësit. Gjatë këtij aksioni, blutë kanë arrestuar në flagrancë një 34-vjeçar dhe kanë proceduar penalisht një tjetër të të njëjtës moshë, i cili shërbente si përgjegjës i hotelerisë në një nga tragetet e linjës.
Sipas njoftimit zyrtar, gjatë kontrolleve të hollësishme u gjetën dhe u sekuestruan në cilësinë e provës materiale 798 steka cigare të paketuara, një armë zjarri automatike e llojit AK-47, një automjet si dhe dy pajisje celulare. Personi i arrestuar është shtetasi me iniciale E. B., 34 vjeç, banues në qytetin e Durrësit.
Ndërkaq, përgjegjësi i hotelerisë së tragetit i proceduar është shtetasi E. S., po ashtu 34 vjeç dhe banues në Durrës. Veprimet e para hetimore ngarkojnë të dyshuarit me akuzat për kontrabandë me mallra që paguhet akcizë dhe mbajtje pa leje të armëve dhe municioneve, ndërsa materialet i kaluan organeve gjegjëse.
Burim: Klan Kosova
— Redaksia ZHURMA