Si u kap 19-vjeçari që goditi vajzën 3-vjeçare në Vizbeg?
Policia ka gjetur automjetin tip Golf dhe ka arrestuar shoferin Xh.B., ndërsa fëmija e lënduar rëndë po merr trajtim mjekësor.
SHKUP — Policia e Shkupit ka arrestuar një 19-vjeçar me inicialet Xh.B. nga fshati Dobrinë, i cili dyshohet se goditi me makinë një vajzë trevjeçare në Vizbeg dhe u largua nga vendi i ngjarjes. Aksidenti ka ndodhur rreth orës 19:00, ku vajza po lëvizte me një biçikletë.
Nëpunësit policorë nga Njësia e Hetimit të Aksidenteve Rrugore arritën të gjejnë makinën e tipit „Volkswagen Golf“ me targa të Shkupit dhe të identifikojnë shoferin. Policia ka kryer kontrollin dhe fotografimin e automjetit, duke zhvilluar edhe bisedë zyrtare me 19-vjeçarin për zbardhjen e ngjarjes.
Vajza e lënduar rëndë është dërguar me urgjencë për trajtim në Qendrën Klinike në Shkup për shkak të plagëve të pësuara. Pas dokumentimit të plotë të këtij rasti, Ministria e Punëve të Brendshme ka njoftuar se do të ngrejë parashtresën përkatëse ligjore ndaj shoferit.
Burim: Almakos
— Redaksia ZHURMA
