Si po e deformon krimi ekonominë sipas Jorida Tabakut?

TIRANË — Deputetja e Partisë Demokratike, Jorida Tabaku, ka shprehur shqetësimin për ndikimin e parave të pista. Ajo i është referuar goditjes së fundit të SPAK ndaj një skeme të dyshuar të pastrimit të parave në ndërtim, duke argumentuar se ekonomia shqiptare po deformohet nga paratë e krimit.

Sipas saj, pasoja e parë e këtij modeli është rritja e papërballueshme e çmimeve të banesave në kryeqytet. Ky fluks i parasë informale e ka kthyer ndërtimin në një treg të paarritshëm për shtresën e mesme dhe të rinjtë, duke shkëputur çmimet nga niveli real i të ardhurave.

Sektori i dytë i goditur sipas deputetes është bujqësia, e cila po vuan zhvlerësimin e euros dhe mungesën e politikave mbështetëse shtetërore. Ky zhvlerësim ka dëmtuar konkurrueshmërinë e fermerëve në tregun rajonal dhe europian, duke i kushtuar ekonomisë sonë miliarda lekë në prodhim të humbur.

Nga ky deformim po goditet edhe industria fason, e cila për vite me radhë ka shërbyer si një nga punëdhënësit dhe eksportuesit kryesorë në Shqipëri. Zhvlerësimi i monedhës europiane dhe problemet strukturore kanë sjellë mbylljen e dhjetëra bizneseve fasonë dhe humbjen e menjëhershme të vendeve të punës për shumë familje.

Sipas deputetes demokrate, pakënaqësia qytetare dhe protestat e javëve të fundit burojnë pikërisht nga ky sistem që favorizon një pakicë të lidhur me pushtetin. Ajo bëri thirrje për ndryshimin e këtij modeli që ka hequr garën e lirë dhe ka dëmtuar prodhimin vendas për më shumë se një dekadë.

Burim: ATSH
— Redaksia ZHURMA