Si mundësoi zyrtari importin e pesticideve të ndaluara?
Zyrtari dyshohet të ketë falsifikuar dokumentin zyrtar për të mundësuar lëshimin e lejeve për pesticidet e ndaluara, sipas standardeve të BE-së.
PRISHTINË — Një person u arrestua të martën nën dyshimin se, duke keqpërdorur pozitën zyrtare, mundësoi lëshimin e lejeve për importin e pesticide dhe produkteve biocide të ndaluara në Kosovë. Sipas Prokurorisë Themelore në Prishtinë, i dyshuari, me inicialet N.M., po hetohet për keqpërdorim të pozitës apo autoritetit zyrtar dhe falsifikim dokumenti zyrtar.
Hetimi u zhvillua në koordinim mes Prokurorisë Themelore, Policisë së Kosovës dhe Drejtorisë për Hetimin e Krimeve Ekonomike dhe Korrupsionit. Arrestimi i realizuar të martën në Prishtinë është rezultat i veprimeve hetimore të zhvilluara në këtë bashkëpunim. Me urdhër të Prokurorit të Shtetit, i dyshuari është ndaluar për 48 orë.
Sipas Prokurorisë, hetimet lidhen me lëshimin e lejeve për disa operatorë ekonomikë për importin e produkteve biocide dhe pesticide, të cilat janë të ndaluara për përdorim në Kosovë sipas listës së Agjencisë Evropiane të Kimikateve (ECHA) të Bashkimit Evropian. I dyshuari po hetohet për veprat penale sipas nenit 414 dhe nenit 427 të Kodit Penal të Kosovës.
Prokuroria Themelore në Prishtinë tha se mbetet e përkushtuar në luftimin e kriminalitetit dhe korrupsionit, dhe do të ndërmarrë të gjitha veprimet hetimore në përputhje me legjislacionin në fuqi.
Burim: Klan Kosova
— Redaksia ZHURMA
Bisedoni
Komentet janë të hapura për anëtarët e Zhurma. Llogaria është falas — krijo një ose hyr për me e thanë mendimin.