Si e mbron Ljutkov ribalancin e Buxhetit?

SHKUP — Ministri i Kulturës dhe Turizmit, Zoran Ljutkov, iu përgjigj pretendimeve të ngritura gjatë debatit në Komisionin për ribalancin e Buxhetit, duke thënë se ato nuk përputhen me dokumentet zyrtare buxhetore. Ai hodhi poshtë pretendimin se mjetet për përforcimin e kuadrove dhe mbikëqyrjen inspektuese janë ridestinuar për pajisje zyre, si dhe pretendimin se janë zvogëluar fondet për Agjencinë e Filmit apo për investimet kapitale.

Ministri bëri të ditur se me ribalancin janë siguruar 61 milionë denarë për projektin “Shkupi – Kryeqyteti Evropian i Kulturës 2028”, si dhe 200 milionë denarë shtesë për investime kapitale. Kritika, tha ai, është e nevojshme në një shoqëri demokratike, por duhet të bazohet në fakte dhe në lexim korrekt të dokumenteve zyrtare buxhetore.

Ljutkov rikujtoi se kur mori drejtimin e Ministrisë në 2024 kishte trashëguar një borxh prej 273 milionë denarësh për paga. Me ribalancin, tha ai, u siguruan mjetet për shlyerjen e këtij obligimi, si dhe 150 milionë denarë shtesë për investime kapitale dhe aktivitete programore.

Sipas Ljutkovit, gjatë mandatit të tij buxheti për aktivitetet programore u rrit me 40%, investimet kapitale me 110%, dhe buxheti për veprimtarinë filmike me 87%. Institucionet kombëtare rritën të ardhurat vetanake me mbi 150%, ndërsa u vendosën procedura më transparente dhe kritere të qarta financimi; Programi për Kulturë i vitit 2025 u realizua në 98%.

Ministri theksoi se këto janë të dhëna zyrtare dhe të verifikueshme, duke shtuar se buxheti nuk mund të interpretohet sipas nevojave politike, por vetëm mbi bazën e fakteve.

Burim: Tetova Sot
— Redaksia ZHURMA