Si do të modernizojë Markata e Peshkut industrinë vlonjate?

VLORË — Ministri i Bujqësisë dhe Zhvillimit Rural, Andis Salla, dhe kryetarja e bashkisë Vlorë, Brunilda Mersini, inspektuan sot Markatën e Peshkut, ku u finalizua kalimi i pronësisë te Bashkia Vlorë. Investimi shënon, sipas Sallës, një hap të rëndësishëm për modernizimin e peshkimit, formalizimin e tregut dhe zhvillimin e ekonomisë blu.

Marketa shtrihet mbi 1.300 m² dhe përfshin 15 dhoma frigoriferike. E integruar me Portin e Peshkimit dhe Portin e Ri Tregtar të Vlorës, ajo do të funksionojë sipas standardeve të Bashkimit Europian — duke garantuar siguri ushqimore, rritje të kapaciteteve të grumbullimit dhe ruajtjes, si dhe kushte për eksport të drejtpërdrejtë drejt tregut europian.

"Është një investim që Ministria e Bujqësisë ka financuar me 1,5 milionë euro për të siguruar mbarëvajtjen e sektorit të peshkimit, për ta sjellë në një ambient të sigurt, për ta magazinuar në dhoma frigoriferike dhe për eksport, sepse ne do të marrim edhe certifikatën për eksport", deklaroi Salla gjatë inspektimit.

Ministri theksoi se 28 anije peshkimi do të kenë mundësinë të depozitojnë produktet e tyre dhe t'i eksportojnë ose t'i tregtojnë në tregun vendas. Peshkatarët nuk do të kenë më nevojë të investojnë individualisht në ambiente magazinimi apo certifikime — "të gjitha produktet e tyre do t'i sjellin këtu", sipas Sallës.

Investimi, sipas ministrit Salla, synon të modernizojë të gjithë zinxhirin e sektorit të peshkimit — nga grumbullimi deri te eksporti. Me infrastrukturën e centralizuar, peshkatarët vlonjatë do të kenë mundësi eksporti të drejtpërdrejtë drejt tregut europian, pa nevojë për certifikime individuale.

Burim: ATSH
— Redaksia ZHURMA