Shtyhet seanca në GJKKO për dënimin e Adriatik Llallës

Gjykata e Posaçme ka shtyrë seancën për kërkesën e ish-Prokurorit të Përgjithshëm, Adriatik Llalla, i cili kërkon parashkrimin e dënimit me dy vite burgim për fshehje pasurie. Prokurorja e Posaçme e SPAK kërkoi kohë shtesë për t'u njohur me materialet e paraqitura nga mbrojtja.

Ish-kreu i Prokurorisë së Përgjithshme u shpall fajtor dhe u dënua në pranverën e vitit 2021 me dy vite burgim për mosdeklarim dhe fshehje pasurie në tri episode të ndryshme. Vendimi mori formë të prerë pasi u la në fuqi nga Apeli i Posaçëm më 22 shtator 2021. Pjesë e vendimit gjyqësor ishte edhe konfiskimi i një apartamenti të vendosur në Durrës, si dhe i rreth 22 mijë metrave katrorë tokë në periferi të Tiranës. Gjithashtu, ndaj tij u vendos heqja e së drejtës për të ushtruar funksione publike për një periudhë prej 5 vitesh. Gjatë procesit hetimor dhe pas largimit nga Shqipëria, Llalla kërkoi azil politik në Itali, ku u arrestua në dhjetor të vitit 2021, por më pas u lirua me kusht dhe u la nën masa mbikëqyrjeje nga autoritetet italiane për shkak të gjendjes së tij shëndetësore, pa iu dorëzuar autoriteteve shqiptare.

Në seancën e zhvilluar, ish-kryeprokurori nuk ishte i pranishëm fizikisht pasi vijon të jetë në kërkim nga autoritetet shqiptare, duke u përfaqësuar në proces nga avokati i tij Sokol Hazizi. Mbrojtja parashtroi pretendimin se dënimi i formës së prerë duhet të konsiderohet i parashkruar, me argumentin se kanë kaluar afro pesë vite nga marrja e vendimit pa u ekzekutuar apo vuajtur dënimi me burg. Pasi dëgjoi pretendimet e avokatit mbrojtës, prokurorja e Posaçme e SPAK, Enkelejda Millonai, kërkoi kohë shtesë për t'u njohur me të gjitha materialet e referuara në këtë kërkesë.

Për këtë arsye, Gjykata e Posaçme vendosi të shtyjë shqyrtimin e kërkesës. Seanca e radhës në GJKKO është caktuar të mbahet më 16 nëntor, në orën 08:30.