Shtyhet Prishtina-Drita, derbi Llapi-Gjilani mbylle xhiron e dytë
Superliga rikthehet këtë fundjavë me xhiron e dytë, ku bie në sy shtyrja e ndeshjes Prishtina-Drita dhe derbi Llapi-Gjilani.
Superliga e Kosovës në futboll rikthehet këtë fundjavë me ndeshjet e xhiros së dytë, e cila sjell disa përballje interesante dhe derbin ndërmjet Llapit e Gjilanit. Xhiroja e dytë do të nisë të premten, me duelin ndërmjet Malishevës dhe Drenicës. Malisheva e nisi sezonin me fitore, ndërsa Drenica barazoi ndaj Dukagjinit, duke bërë që kjo përballje të pritet me interes.
Të shtunën do të zhvillohen dy ndeshje: Dukagjini do të përballet me Feronikelin ’74, ndërsa Ballkani do të presë Vushtrrinë. Xhiroja do të mbyllet të dielën me derbin Llapi – Gjilani, një nga përballjet më interesante të kësaj jave. Ndërkohë, ndeshja Prishtina – Drita është shtyrë për shkak të pjesëmarrjes së Dritës në garat evropiane.
Të gjitha ndeshjet e kësaj xhiroje janë planifikuar të nisin në orën 16:30.