Shtatë të vdekur dhe 112 të plagosur nga përplasja e dy trenave në Egjipt

Numri i të lënduarve nga përplasja e dy trenave në provincën e Gizës është rritur në 112 të plagosur, ndërsa të paktën 7 persona kanë humbur jetën. Hekurudhat Kombëtare Egjiptiane njoftuan se incidenti ndodhi kur një tren që udhëtonte nga Giza për në Fayoum u përplas me pjesën e pasme të një treni të dytë në linjën nga Kajro për në Asuan. Përplasja midis stacioneve Kafr Ammar dhe Al Raqqa solli daljen e disa vagonëve nga shinat.

Aksidentet hekurudhore në këtë shtet shkaktohen kryesisht nga gabimet njerëzore në kalimet në nivel dhe sinjalet jofunksionale. Zona e prekur ka regjistruar të paktën katër aksidente fatale që nga viti 2000, përfshirë tragjedinë e 20 shkurtit 2002 me mbi 350 viktima nga një zjarr në tren, si dhe përplasjen e 24 tetorit 2009 ku humbën jetën 30 persona dhe u plagosën 58 të tjerë. Ngjarje të ngjashme u shënuan gjithashtu në muajt janar dhe shtator të vitit 2016.