Shqipëria përballet me Finlandën në ndeshjen e parafundit të Grupit C1

Kombëtarja shqiptare do të luajë mbrëmjen e së enjtes ndeshjen e raundit të parafundit të Ligës së Kombeve kundër Finlandës në «Arenën Kombëtare». Kuqezinjtë kërkojnë të marrin një rezultat pozitiv për të konfirmuar vendin e parë në Grupin C1 të këtij kompeticioni. Takimi do të transmetohet në platformën Digitalb.

Përballja e ardhshme mes dy përfaqësueseve vjen pas një historie të gjatë sfidash direkte, ku bilanci i përgjithshëm anon nga skuadra skandinave. Në të gjitha takimet e zhvilluara, Finlanda ka regjistruar 5 fitore, Shqipëria ka arritur 2 fitore, ndërsa 1 ndeshje është mbyllur me barazim.

Pjesa më e madhe e përballjeve historike mes Shqipërisë dhe Finlandës kanë qenë në kuadër të eliminatoreve për Kupën e Botës. Gjithçka ka nisur në kualifikueset e Botërorit 1974, ku ndeshja e parë e luajtur më 21 qershor 1972 përfundoi me fitoren 1-0 të skandinavëve. Në sfidën e kthimit të zhvilluar në Shqipëri më 10 tetor 1973, Kombëtarja kuqezi fitoi me të njëjtin rezultat 1-0.

Të dyja përfaqësueset u ndeshën sërish gjatë kualifikueseve të Botërorit 1982. Më 3 shtator 1980, kuqezinjtë fituan me rezultatin 2-0, ndërsa në ndeshjen e zhvilluar më 2 shtator 1981 Finlanda triumfoi me shifrat 2-1. Dy dekada më vonë, në eliminatoret e Botërorit 2002, skandinavët fituan të dyja sfidat direkte: 2-1 në ndeshjen e 2 shtatorit 2000 dhe 2-0 në takimin e luajtur më 1 shtator 2001.

Barazimi i vetëm në historinë e tyre është regjistruar më 7 janar 2002 gjatë një turneu me katër skuadra në Bahrein, ku sfida përfundoi me rezultatin 1-1. Ndeshja më e fundit mes dy ekipeve është zhvilluar më 3 tetor në Helsinki në kuadër të këtij edicioni të Ligës së Kombeve, ku Finlanda arriti të fitonte me përmbysje 2-1.