Protesta studentore ndryshon axhendën e Kombëtares para ndeshjes me Finlandën

Protesta studentore e paralajmëruar nga ora 14:00 ka sjellë një ndryshim të paprecedentë në axhendën e Kombëtares shqiptare dhe ekipit mik të Finlandës, në prag të ndeshjes mes tyre. Sipas njoftimit zyrtar nga FSHF, kuqezinjtë do të zhvillojnë seancën zyrtare stërvitore paradite në orën 11:00, ku 15 minutat e para do të jenë të hapura për mediat, ndërsa konferenca zyrtare e trajnerit dhe një lojtari do të mbahet në orën 16:00 në stadiumin “Air Albania”. Përfaqësuesja e Finlandës ka planifikuar konferencën për media në orën 11:30 dhe seancën stërvitore në orën 12:30.

Ky vendim vjen si masë parandaluese pas ndikimit që pati një protestë e ngjashme te ndeshja europiane e Egnatias kundër Midtjylland. Për shkak të atij tubimi, sfida e planifikuar në “Air Albania” u zhvendos në “Elbasan Arena”, kurse stërvitja e danezëve u ndërpre nga gazi lotsjellës, duke shtyrë federatën të shmangë tensione të ngjashme për duelin e radhës.