Shqipëria përballet me Bjellorusinë në Budapest për ngjitjen në Ligën B
Kombëtarja shqiptare luan ndeshjen e fundit të grupeve në Ligën e Kombeve, ku i mjafton një barazim për të siguruar vendin e parë.
Redaksia ZHURMA · · Përditësuar · 1 min lexim
Përfaqësuesja e Shqipërisë luan në stadiumin «Illovszky Rudolf» në Budapest të Hungarisë ndeshjen e fundit të fazës së grupeve në Ligën e Kombeve, ku do të ketë përballë Bjellorusinë për Grupin C1. Kuqezinjtë vijnë në këtë takim si kryesues të grupit me 12 pikë, ndërsa Bjellorusia renditet në vendin e dytë me 10 pikë. Ekipit kombëtar i mjafton vetëm një barazim për të siguruar vendin e parë dhe ngjitjen në Ligën B.
Ndeshja do të zhvillohet me dyer të mbyllura për shkak të sanksioneve të vendosura nga Komiteti Ekzekutiv i UEFA-s më 3 mars 2022, të cilat detyrojnë kombëtaren dhe klubet e Bjellorusisë t'i luajnë ndeshjet si pritëse në terrene neutrale dhe pa spektatorë. Për këtë arsye, tifozët shqiptarë nuk do të kenë mundësinë ta mbështesin nga afër skuadrën. Takimi do të nisë në orën 18:00, teksa Shqipëria synon të mbyllë me sukses këtë edicion pas fitores së arritur ndaj Finlandës.