Uzuni: Ndeshja me Bjellorusinë ishte finale për Shqipërinë
Sulmuesi Myrto Uzuni flet pas fitores që i dha Kombëtares ngjitjen në Ligën B dhe vendin në vazon e tretë të Euro 2028.
Redaksia ZHURMA · · 1 min lexim
Kombëtarja e Shqipërisë ka siguruar promovimin në Ligën B pas një fitoreje të arritur jashtë fushe me rezultat 0-2 ndaj Bjellorusisë. Në prononcimin e tij pas përfundimit të takimit për «Supersport», sulmuesi Myrto Uzuni vlerësoi paraqitjen e skuadrës dhe theksoi se të gjithë futbollistët dhanë maksimumin për të marrë tri pikët. «Kemi bërë një ndeshje shumë të madhe sot, ka qenë një finale për ne. E dimë kualitetin tonë, erdhëm për të fituar dhe çunat kanë bërë një ndeshje të madhe», u shpreh lojtari.
Gjatë deklaratës së tij, sulmuesi beratas veçoi edhe rëndësinë e tifozëve, të cilët i cilësoi si forcën më të madhe të ekipit kombëtar, ndërsa shtoi se dy fitoret e fundit ishin plotësisht të merituara. «Tifozët kanë qenë forca jonë më e madhe. Të dy fitoret kanë qenë më se të merituara. Gjithmonë i marrim ndeshjet një nga një. Krijojmë më shumë raste tani përpara dhe të gjithë lojtarët japin maksimumin», tha ai.
Përveç ngjitjes në Ligën B, ky rezultat e ka siguruar Shqipërinë edhe në vazon e tretë për «Euro 2028». Shorti zyrtar për këtë kompeticion pritet të tërhiqet në fillim të muajit dhjetor.