Shqipëria e para për fondet e BE-së, Kosova dhe Serbia humbin paratë
Nga gjashtë vende aspirante për në BE, vetëm tri kanë arritur të përfitojnë nga Plani i Rritjes, ndërsa Kosova, Serbia dhe Bosnja mbeten pas.
Të gjithë duan integrim, por miliardat e eurove nga Bashkimi Evropian kanë zbuluar një Ballkan Perëndimor që ecën në dy kahe. Nga gjashtë vende aspirante për në BE, vetëm tri kanë arritur të përfitojnë nga Plani i Rritjes bazuar te përmbushja e reformave.
Në një artikull nga Euractiv, Shqipëria, Mali i Zi dhe Maqedonia e Veriut vlerësohen si vendet që falë stabilitetit të politikës së brendshme ia kanë dalë të shfrytëzojnë mekanizmin. Shqipëria mbetet lidere në rajon për këto fonde, ndërsa nga ana tjetër, Kosova, Serbia dhe Bosnjë e Hercegovina janë bllokuar për shkak të krizave politike.
Kriza e brendshme politike dhe mungesa e konsensusit kanë bërë që Prishtina të përfitojë më pak, ndërsa BE-ja ka paralajmëruar se kohëzgjatja e krizës rrezikon të djegë fondet e parashikuara.