Ahmetaj: Kosova të shfrytëzojë pozicionet e shteteve për rrugën drejt BE-së

Procesi i integrimit evropian kërkon angazhim diplomatik dhe shfrytëzim të pozicioneve të ndryshme shtetërore, sipas diplomates Mimoza Ahmetaj, e cila ka vënë në dukje ngecjen e vendit në këtë drejtim. Gjatë një paraqitjeje televizive, ajo ka shtruar nevojën që institucionet të nxjerrin mësime nga përvoja e shteteve të tjera dhe të argumentojnë vonesat institucionale. «Kosova nga secili do të mund t’i merrte mësimet dhe ta konvertonte pozicionin e secilit shtet në favor të vetin, dhe ta argumentonte pse Kosova, e cila ka katër vjet që nga koha e aplikimit për marrjen e statusit kandidat, edhe më tutje vazhdon të mbahet peng, ndërkohë që shtetet e tjera tashmë kanë avancuar», u shpreh ajo.

Duke trajtuar ndikimin e faktorëve gjeopolitikë dhe fuqive të mëdha në agjendën e integrimeve, ajo sugjeroi se diplomacia vendore duhet të tregohet e vëmendshme ndaj çdo mundësie që ofrohet për të shpejtuar procedurat e ngadaltësuara. «A duhet patjetër ta kemi edhe ne Rusinë apo një fuqi të tretë në mënyrë që neve të na përshpejtuar procedura? Domethënë, ka momente dhe mundësi nga të cilat do të përfitonim», theksoi ajo.