Shkupi përgatitet për motin e ligë pasditen e sotme
Si mund të kontribuojnë qytetarët në parandalimin e dëmeve?
Redaksia ZHURMA.
SHKUP — Qyteti i Shkupit njoftoi se po përgatitet për motin e ligë që pritet pasditen e sotme. Shtabi i Krizave ka mbajtur takim dhe është mobilizuar plotësisht, ndërsa ekipet do të jenë vazhdimisht në terren, të gatshme të ndërhyjnë me kohë dhe të përballen me pasojat e mundshme.
“Të gjitha kapacitetet njerëzore dhe teknike janë vënë në funksion për mbrojtjen e qytetarëve, pronës dhe infrastrukturës së qytetit, si dhe për parandalimin e dëmeve më të mëdha”, thuhet në njoftimin e Qytetit të Shkupit. Aktivitetet zhvillohen çdo ditë, por kërkojnë edhe përgjegjësinë e secilit qytetar.
Ekipet e NP “Ujësjellësi dhe Kanalizimi” në Shkup po kryejnë pastrim intensiv të rrjetit të kanalizimit, pusetave dhe grilave kulluese, për të siguruar largimin pa pengesa të ujërave atmosferike dhe për të zvogëluar rrezikun e përmbytjeve në pikat kritike të qytetit.
Qyteti u bën thirrje qytetarëve të mos hedhin mbeturina në pusetat, grilat kulluese dhe hapësirat publike, pasi kjo bllokon rrjedhën dhe pengon largimin e duhur të ujërave të shiut. “Ngelemi vigjilentë, të mobilizuar dhe plotësisht në shërbim të qytetarëve”, thuhet në njoftim.
Burim: TV21
— Redaksia ZHURMA