Sa thirrje emergjente regjistron Shkupi gjatë vapës?

SHKUP — Numri i thirrjeve në shërbimet emergjente në Shkup ka shënuar rritje të ndjeshme gjatë tre ditëve të fundit, ku numri i intervenimeve për një natë shkon nga 65 deri në 70 raste. Sipas shefes së ndërrimit të emergjencës, Ana Xharova, një e treta e këtyre thirrjeve ndodh jashtë shtëpive, si pasojë direkte e temperaturave të larta.

Situata është kritike pasi i gjithë kryeqyteti mbulohet nga vetëm gjashtë ekipe të Ndihmës së Shpejtë në një turn. Çdo ekip përbëhet nga tre persona — një mjek, një infermier dhe një shofer — të cilët janë të detyruar të përgjigjen për të gjitha thirrjet emergjente në një zonë të gjerë urbane.

Mjekja Xharova deklaron se shumica e rasteve kanë të bëjnë me kolapse, ku regjistrohen nga 7 deri në 10 raste të tilla në ditë. Vetëm deri në mesditë të sotme, janë regjistruar rreth pesë kolapse në vende publike, ku shumica e tyre zgjidhen në vend, ndërsa rastet me lëndime përfundojnë në spital.

Autoritetet shëndetësore sugjerojnë që qytetarët të shmangin ekspozimin në diell nga ora 11:00 deri në orën 17:00 dhe të sigurojnë hidratimin e organizmit. Rekomandohet që të shmangen aktivitetet e rënda fizike apo sporti gjatë kulmit të vapës për të parandaluar rreziqet shëndetësore.

Kujdesi i shtuar kërkohet sidomos për fëmijët, gratë shtatzëna dhe personat me sëmundje kronike, përfshirë ata me diabet, sëmundje të zemrës apo probleme pulmologjike. Xharova këshillon që në rastin e kolapsit të një qytetari, ai të bartohet menjëherë në hije apo ambient të freskët dhe të freskohet me ujë.

Burim: Alsat-M
— Redaksia ZHURMA