Çfarë synon panairi i ndërmarrëseve shqiptare në Zvicër?
Ngjarja e organizuar në Fislisbach bën bashkë biznese dhe profesioniste nga Zvicra e rajoni për të promovuar fuqizimin ekonomik dhe bashkëpunimin.
FISLISBACH — Ka hapur sot dyert panairi “She Leads 2026”, i cili vlerësohet si një nga ngjarjet më të mëdha të dedikuara për gratë sipërmarrëse shqiptare në diasporë dhe rajon. Ky event i rëndësishëm po zhvillohet në ambientet e AMAG Baden në qytetin e Fislisbachut në Zvicër.
Ky organizim sjell së bashku gra ndërmarrëse, profesioniste të fushave të ndryshme, kompani e përfaqësues institucionesh nga Zvicra, Kosova, Shqipëria dhe Maqedonia e Veriut. Organizatorët synojnë të krijojnë ura të forta bashkëpunimi mes bizneseve, duke promovuar kështu fuqizimin e plotë ekonomik të grave sipërmarrëse shqiptare.
Përgatitjet për këtë ngjarje janë përmbyllur me sukses, ndërsa pjesëmarrësit do të kenë mundësi të ndjekin prezantime të ndryshme, diskutime tematike dhe takime biznesore gjatë gjithë ditës. Ky aktivitet synon të shërbejë si një mundësi e shkëlqyer për networking, partneritete të reja dhe për zhvillim profesional të mëtejshëm.
Eventi pritet të mbledhë qindra vizitorë, duke e kthyer atë në një platformë kryesore për shkëmbimin e përvojave profesionale dhe promovimin e bizneseve shqiptare. Organizatorët u kanë bërë thirrje të gjithë të interesuarve që të bëhen pjesë e këtij panairi për të mbështetur rrugëtimin e grave drejt suksesit.
Burim: Albinfo.ch
— Redaksia ZHURMA