Si u zbulua droga e fshehur në kuti DVD-sh e CD-sh në Shkup?

SHKUP — Më 12 qershor, Drejtoria e Doganave ka arritur të parandalojë një përpjekje për kontrabandim të paligjshëm të lëndëve narkotike, e cila po tentohej të realizohej përmes një dërgese postare të ardhur nga Franca. Zyrtarët doganorë konfirmuan se pakoja në fjalë ishte e destinuar për një shtetas nga Shtetet e Bashkuara të Amerikës dhe lënda narkotike ishte e fshehur brenda kutive të disqeve DVD dhe CD.

Zbulimi i këtij rasti nisi gjatë kontrollit të dërgesave me skaner, ku u detektua një përmbajtje e dyshimtë. Më pas, në këtë aksion u përfshi edhe një ekip i specializuar doganor i pajisur me qen nuhatës, të cilët bënë të mundur gjetjen e drogës. Gjatë këtij kontrolli të detajuar u zbuluan sasi të ndryshme të metamfetaminës, MDMA-së dhe kokainës.

Me urdhër të veçantë të prokurorisë përkatëse, personi i dyshuar është arrestuar në flagrancë pikërisht gjatë marrjes së pakos postare. Po ashtu, gjatë kontrollit të ushtruar në shtëpinë e të arrestuarit u gjetën substanca të tjera të dyshimta dhe sende të lidhura me përdorimin e drogës, ndërsa rasti iu dorëzua prokurorisë për procedurë të mëtejshme.

Burim: TV21
— Redaksia ZHURMA