Çfarë theksoi Sejko për kalimin e Shqipërisë drejt një ekonomie pa para fizike?

TIRANË — Guvernatori i Bankës së Shqipërisë, Gent Sejko, mori pjesë në workshopin “Cashless Albania: Një ekonomi pa përdorimin e parasë fizike — a jemi gati?”, të organizuar nga Akademia e Shkencave e Shqipërisë.

Në fjalën e tij, Sejko theksoi se kalimi drejt një ekonomie me pagesa elektronike është një element kyç për modernizimin e sistemit financiar shqiptar. Ai vuri në dukje se ky proces kërkon bashkëpunim të ngushtë midis institucioneve publike, sektorit bankar dhe akademisë.

Banka e Shqipërisë ka qenë promotore e reformave në fushën e digjitalizimit të pagesave, duke ndërtuar kornizën ligjore dhe infrastrukturën e nevojshme. Ndër arritjet kryesore përmend transpozimin e kuadrit evropian PSD2, zhvillimin e konceptit të bankingut të hapur dhe miratimin e ligjit për llogarinë bazike të pagesave.

Një hap i rëndësishëm është anëtarësimi i Shqipërisë në Zonën e Vetme të Pagesave në Euro (SEPA). Kjo lejon qytetarët dhe bizneset shqiptare të kryejnë transferta në euro me kosto më të ulëta dhe sipas standardeve të Bashkimit Evropian. Sejko theksoi se suksesi i këtij transformimi varet edhe nga edukimi financiar i qytetarëve.

Guvernatori vlerësoi kontributin e Akademisë së Shkencave në nxitjen e dialogut shkencor dhe mbështetjen e reformave që promovojnë një kulturë financiare dhe digjitale më të avancuar. Ai nënvizoi se procesi duhet të zhvillohet gradualisht, duke marrë parasysh sfidat ekzistuese, si korrupsioni dhe nevojat e sistemit prodhues.

Burim: Gazeta Tema
— Redaksia ZHURMA