Sean “Diddy” Combs dërgohet në spital pas një lëndimi në qeli

Reperi amerikan Sean “Diddy” Combs ka përfunduar përkohësisht në spital gjatë vuajtjes së dënimit, pasi ka goditur kokën në krevatin dykatësh të qelisë. Ngjarja ka ndodhur në ambientet e burgut federal FCI Fort Dix, ndërsa dëmtimi nuk paraqiste rrezik për jetën dhe ishte i lehtë.

Ai është kthyer sërish në burg disa orë më vonë, i vetëdijshëm dhe në gjendje të fliste. Lidhur me rastin, përfaqësuesi i tij ka thënë se po përpiqej të konfirmonte rrethanat e incidentit, duke shtuar se «shëndeti dhe mirëqenia e Seanit janë shqetësimi ynë kryesor».

Ky zhvillim pason pretendimet e ngritura nga disa raportime rreth mënyrës së jetesës së tij prapa grilave, përfshirë shpenzime mujore për shërbime të ndryshme nga të burgosurit e tjerë, si dhe sigurimin e paligjshëm të një telefoni celular dhe alkooli. Ndërkohë, ai po vuan dënimin e dhënë më herët dhe mbetet në pritje të vendimit lidhur me çështjen e apelimit.