Çfarë kërkon SBASHK-u nga ministri i ri i Arsimit?

PRISHTINË — Kryetari i SBASHK-ut, Rrahman Jasharaj, ka paraqitur tre kërkesa kryesore për ministrin e ardhshëm të Arsimit, duke e nisur me rikthimin e praktikës së mëhershme të shpërndarjes së teksteve shkollore dhe hapjen e dialogut me akterët e arsimit për çështjet kryesore që prekin sistemin arsimor.

"Uroj që të vijë një ministër që e njeh dhe e do arsimin dhe i dëgjon edhe këshillat e propozimet e të tjerëve", ka thënë Jasharaj për Indeksonline.

Ai ka kritikuar modelin e 2-3 viteve të fundit, ku prindërit kishin vrapuar nga njëra librari në tjetrën dhe prisnin për rimbursim. "Mos të shkohet më me metodën e 2-3 viteve të fundit, sepse prindërit kishin halle të vraponin nga njëra librari në tjetrën dhe të prisnin për rimbursim. Pra, më mirë është të kthehemi në mënyrën e kahershme, që tekstet shkollore të dërgohen në shkolla e pastaj të shpërndahen, e jo të presim 2-3 muaj për furnizim", ka theksuar ai.

Kërkesa e dytë e sindikalistit është nënshkrimi i kontratës kolektive, dhe ai ka kërkuar që ministri i ardhshëm të ketë gatishmëri për dialog. "Jemi nga vendet e rralla në botë që s'kemi marrëveshje as në nivel vendi e as kontratë kolektive", vlerësoi ai.

Tutje, Jasharaj ka kërkuar përmirësimin e kushteve të punës në shkolla dhe ngritjen e pagave. "Do të bisedojmë për kushtet e punës, në mënyrë që shkollat të mos i ngjajnë shekullit të kaluar, që të ndahen mjete dhe ato të jenë me mjete bashkëkohore e jo me shkumësa e shpuza. Edhe ministri ta ngrejë zërin për pagat, sepse kemi pagat më të vogla karshi pagave në arsim në Shqipëri, Mal të Zi dhe vendet e tjera", tha Jasharaj.

Kërkesat vijnë në kohën kur pozita e ministrit të Arsimit mbetet e hapur, duke i shtuar presion politik çështjeve që SBASHK-u i konsideron të pazgjidhura prej vitesh.

Burim: IndeksOnline
— Redaksia ZHURMA