Si do të veprojë Saubermacher për faturat e papaguara në Tetovë?

TETOVË — Kompania përgjegjëse për grumbullimin e mbeturinave në Tetovë, "Saubermacher", ka njoftuar se gjatë muajit korrik 2026 do të nisë procedurat për pagesë të detyrueshme për obligimet e papaguara të vonuara përmes procedurës noteriale. Kjo masë vjen pas një sërë apelimesh dhe njoftimesh paraprake drejtuara përdoruesve.

"Kompania e cila prej tre vitesh tashmë e kryen në mënyrë profesionale dhe të përgjegjshme shërbimin e grumbullimit dhe transportit të mbeturinave komunale nga amvisëritë dhe subjektet juridike, u bën apel të gjithë përdoruesve që kanë obligime të papaguara sipas faturave të lëshuara, që t'i shlyejnë ato në afatin më të shkurtër të mundshëm", thuhet në njoftimin e kompanisë, datuar 26 qershor. "Në këtë mënyrë mund të shmanget fillimi i procedurës si dhe kostot shtesë që lidhen me zbatimin e saj."

Koncesioneri i mbeturinave në Tetovë thekson se angazhimi i tyre që tre vite ka dhënë rezultate konkrete për një qytet më të pastër. "Saubermacher Tetovë tashmë që tre vitesh po e kryen në mënyrë profesionale dhe të përgjegjshme shërbimin e grumbullimit dhe transportit të mbeturinave komunale, si dhe vazhdimisht po investon në sistemin e menaxhimit të mbeturinave, në mekanizëm modern, infrastrukturë, staf dhe shërbime shtesë për selektimin dhe deponimin e mbeturinave voluminoze."

Falë këtyre investimeve, shërbimi realizohet sot në mënyrë më cilësore dhe efikase, në përputhje me standardet moderne. Kompania shton se "me pagesën e rregullt sigurohen shërbime më cilësore ndaj qytetarëve". "Me pagesën e rregullt sigurohen kushte më të mira jetese në qytetin tonë dhe shmangen situata të pakëndshme dhe të panevojshme që mund të ndodhin gjatë procedurave noteriale", thonë nga Saubermacher.

Për të lehtësuar pagesat, kompania ofron disa pika takimi: "zyrën në Pallçisht të Poshtëm, zyrën në Tetovë në afërsi të shkollës fillore Liria, në zyrat që ndodhen në hapësirat e Ndërmarrjes Publike Komunale-Tetova në Tregun e Gjelbër ose përmes shërbimeve online".

Nga kompania bëjnë thirrje për bashkëpunim: "Bashkëpunimi juaj është me rëndësi të madhe dhe me shlyerjen me kohë të detyrimeve kontribuojmë në funksionimin më të mirë të komunitetit tonë".

Burim: Koha.mk, 26.06.2026
— Redaksia ZHURMA