Sa specialistë të rinj kërkojnë klinikat e QKUK-së?

PRISHTINË — Klinikat e Qendrës Klinike Universitare të Kosovës (QKUK-ja) kanë dorëzuar kërkesa për staf shtesë, ndërsa Shërbimi Spitalor Klinik dhe Universitar i Kosovës (SHSKUK-ja) ende nuk ka hapur konkurs për rekrutimin e specialistëve. Kardiokirurgjia kërkon 4–7 kardiokirurgë të rinj brenda tre viteve, Neurokirurgjia kërkon edhe tre specializantë të rinj, ndërsa Onkologjia dhe ORL-ja kanë kërkuar vazhdimisht shtimin e personelit.

Klinika e Kardiokirurgjisë punon aktualisht me tetë specialistë. Drejtori i saj, Shpejtim Shurdhiqi, i ka quajtur përforcimet të domosdoshme. Arsyeja: një listë pritjeje me rreth 140 raste dhe kohë mesatare pritjeje prej gjashtë muajsh, pavarësisht vëllimit të lartë të operacioneve komplekse.

«Në periudhën 1 deri 3-vjeçare është e domosdoshme punësimi i 4–7 kardiokirurgëve të rinj, për të cilët edhe kemi bërë kërkesë,» ka thënë Shurdhiqi. Sipas tij, zhvillimi i procedurave të reja kardiokirurgjike e bën punësimin e domosdoshëm. Në këtë klinikë, të paktën në dy vitet e ardhshme, nuk pritet pensionimi i asnjë mjeku.

Klinika e Neurokirurgjisë punon me tetë neurokirurgë. Këtë vit pritet të specializojnë gjashtë specializantë, ndërsa klinika ka bërë kërkesë edhe për tre specializantë të rinj. Brenda pesë viteve të fundit, numri i operacioneve neurokirurgjikale është dyfishuar, sipas drejtorit Besnik Elshani.

«Sipas referencës së Bashkësisë Evropiane, në kokë banori llogaritet të jenë 1 neurokirurg në 100 mijë banorë,» ka thënë Elshani, çka sipas tij tregon nevojën dhe kërkesën për staf të ri. Lista e pritjes ekziston vetëm për hernie diskale lumbale, deri në tre muaj; aktivizimi i sallës së dytë permanente pritet ta eliminojë krejtësisht atë, sipas tij.

Klinika e Onkologjisë punon me 13 onkologë dhe pesë specialistë të radioterapisë, ndërsa drejtuesit e saj kanë kërkuar vazhdimisht shtim të personelit profesional. Në ORL punojnë vetëm tre specialistë, që trajtojnë rastet e komplikuara të laringologjisë dhe ndërhyrjet kirurgjikale të gjëndrës tiroide.

Në pyetjen nëse do të merren parasysh kërkesat e klinikave për shtimin e stafit, nga SHSKUK-ja kanë thënë se të gjitha janë shqyrtuar dhe proceduar sipas kompetencave, por se rekrutimet varen nga pozitat e kërkuara dhe nga rishikimi i buxhetit.

Burim: Koha.net
— Redaksia ZHURMA