Sa ka arritur mbështetja për Kombëtaren shqiptare sipas UEFA-s?
Një studim i UEFA-s dhe agjencisë Nielsen tregon se përkrahja për ekipin kuqezi ka shënuar rritje rekord gjatë dhjetë viteve të fundit.
TIRANË — Mbështetja për Kombëtaren shqiptare të futbollit ka arritur nivele rekord gjatë dhjetë viteve të fundit. Sipas gjetjeve të raportit të ri “UEFA Grow Market Research”, të realizuar nga UEFA në bashkëpunim me agjencinë Nielsen, përkrahja për ekipin kuqezi është rritur nga 61% në vitin 2016 në plot 91% në vitin 2026.
Kjo shifër e lartë e pozicionon Shqipërinë dukshëm mbi mesataren europiane të mbështetjes për ekipet kombëtare, e cila aktualisht është 70%. Për më tepër, raporti tregon se për 70% të tifozëve shqiptarë që ndjekin futbollin, Kombëtarja mbetet prioriteti kryesor, ndërsa vetëm 15% e tyre vendosin në plan të parë futbollin e klubeve.
Sa i përket ndjekjes së futbollit në nivel klubesh, interesi mbetet i ndarë mes ligave të huaja dhe asaj vendase. Rreth 35% e tifozëve shqiptarë mbështesin një klub jashtë Shqipërisë, ndërsa 28% deklarojnë se përkrahin një klub vendas. Kjo dëshmon një lidhje të qëndrueshme me futbollin ndërkombëtar të klubeve.
Në arenën ndërkombëtare të përfaqësueseve, Italia vazhdon të jetë ekipi i huaj më i ndjekur nga shqiptarët me 29%, e pasuar nga Gjermania me 26%. Megjithatë, mbështetja për ngjyrat kuqezi mbetet dominuese, duke u konfirmuar si faktori kryesor që bashkon dhe nxit pasionin për sportin në vend.
Burim: Sportekspres
— Redaksia ZHURMA
