Përplasje mes nënës së Bleona Matës dhe avokatit live në studio

Pak ditë më parë, avokati Alban Duraj gjatë një daljeje në emisionin «Breaking me Fiori Dardha» foli lidhur me rastin e Bleona Matës, duke deklaruar se ajo është gjetur dhe se është e birësuar nga një çift grek. Ai pretendonte se këto informacione i kishte marrë nga një komunikim që kishte pasur me nënën e Bleonës, zonjën Bukurie. Këto pretendime u hodhën poshtë menjëherë nga avokati i familjes, Idajet Beqiri, i cili në një prononcim për emisionin «Shqipëria Live» u shpreh se deklaratat e Durajt ishin të papërgjegjshme dhe se ai nuk kishte asnjë lidhje me çështjen në fjalë. Përplasja mes palëve ka vijuar më tej kur avokati Duraj dhe zonja Bukurie janë vënë përballë gjatë një lidhjeje të drejtpërdrejtë në emisionin «Ftesë në 5» me moderatore Bieta Sulon. Në këtë lidhje, nëna e Bleonës shprehu hapur tronditjen e saj për fjalët e thëna. Ajo deklaroi se nuk ka pasur asnjë lloj komunikimi apo telefonate me avokatin dhe se është shokuar nga fakti që dikush flet në emër të një nëne. Gjatë emisionit, ajo u shpreh: «Jam shokuar nga një avokat, Alban Duraj, që ka folur në emrin ë një nëne, që kam kontaktuar me nënë e Bleonës, që Bleona është studente ekselente. Jam një nënë që përballem me padrejtësisë, unë jam vetëm me të vërtetën. Me këtë njeri nuk kam patur asnjë telefonatë, asgjë. Avokati të bëjë një punë të palodhur, të pastër dhe të vërtetë. Jo të lëndosh, po më helmojnë çdo ditë. Si është e mundur të flasë në emrin e një nëne». Nga ana e tij, avokati Alban Duraj është mbrojtur duke këmbëngulur se ai thjesht ka cituar atë që i ka thënë vetë zonja Bukurie. Ai shpjegoi se ka qenë i ftuar si ekspert në një emision në RTSH dhe se është kujdesur gjithmonë të sqarojë se nuk paraqitet si avokati zyrtar i familjes, por se e ka parë si detyrim moral të japë mendimin e tij për këtë çështje, duke shtuar se ka dëshmi dhe linkun për komunikimet e pretenduara.

Burimet: JavaNews; Zhurnal.mk (klaster 2 outlets).