Sa do të rritet ekonomia shqiptare sipas FMN-së?

TIRANË — Ekonomia e Shqipërisë pritet të rritet me një mesatare prej 3.19% në vit gjatë periudhës 2027–2031, sipas parashikimeve më të fundit të Fondit Monetar Ndërkombëtar (FMN). Ritmi mbetet dukshëm mbi mesataren e pritur për eurozonën dhe Bashkimin Europian, në një kohë kur kontinenti po përgatitet për një dekadë rritjeje të ngadaltë.

Sipas FMN-së, zona euro do të rritet me vetëm 1.2% në vit gjatë kësaj periudhe, ndërsa Bashkimi Europian në tërësi me rreth 1.4%. Të dyja shifrat janë shumë më të ulëta se mesatarja globale prej 3.2%. Disa ekonomi më të vogla europiane pritet megjithatë të rriten dukshëm më shpejt.

Në krye të renditjes qëndron Malta, me rritje mesatare 3.96% në vit, e ndjekur nga Kosova me 3.95%. Ukraina renditet e treta me 3.78%, me pritshmëri që rimëkëmbja e saj të mbështetet nga procesi i rindërtimit pas luftës.

Serbia pritet të rritet me 3.52% në vit, e nxitur nga investimet e mëdha publike dhe përgatitjet për Expo 2027. Moldavia pritet të ketë rritje mesatare prej 3.5%, falë reformave dhe mbështetjes financiare nga Bashkimi Europian.

Shqipëria bën pjesë në këtë grup ekonomish me ritme mbi mesataren europiane, edhe pse renditet e fundit mes tyre. Ritmi i saj prej 3.19% mbetet megjithatë shumë mbi 1.2% e parashikuar për eurozonën dhe 1.4% për Bashkimin Europian në tërësi.

Ekonomitë më të mëdha të Europës pritet të vazhdojnë me ritme shumë më të ulëta, thotë FMN. Plakja e popullsisë, borxhi i lartë publik, produktiviteti i dobët, kostot e energjisë dhe pasiguritë gjeopolitike do të vazhdojnë të frenojnë rritjen ekonomike në vitet e ardhshme. Në këtë panoramë, Shqipëria mbetet një ndër pak ekonomi europiane që rritet më shpejt se mesatarja e kontinentit.

Burim: Euronews Albania
— Redaksia ZHURMA