Sa gati është rruga Elbasan-Rrogozhinë?
Realizimi fizik i aksit rrugor, pjesë e Korridorit VIII, ka arritur në 87%, ndërsa punimet në fazën e dytë kanë nisur me shtrimin e shtresave asfaltike.
TIRANË — Realizimi fizik i aksit rrugor Elbasan-Rrogozhinë, pjesë e Korridorit VIII, ka arritur në 87%, ndërsa punimet vijojnë me ritme të mira. Ministri i Infrastrukturës dhe Energjisë, Enea Karakaçi, bëri të ditur se në gjashtë fazat e para të zbatimit janë drejt përfundimit të gjitha veprat e artit.
Në segmentin Papër–Ura e Grykshit (Faza II), kanë nisur punimet për shtrimin e shtresave asfaltike dhe vendosjen e elementeve të sigurisë rrugore.
Përfundimi i këtij aksi do të sjellë përfitime të ndjeshme: shkurtimi i kohës së udhëtimit, rritja e sigurisë rrugore dhe lidhja më e mirë mes zonave përreth. Sipas ministrit, kjo do të përmirësojë ndjeshëm qarkullimin në këtë korridor.
Burim: ATSH
— Redaksia ZHURMA