Rritje e numrit të votuesve nga Kosova në listat zgjedhore të Serbisë
Lista e votuesve nga Kosova në Serbi ka shënuar rritje prej më shumë se 20 mijë qytetarësh mes dy cikleve zgjedhore.
Redaksia ZHURMA · · 1 min lexim
Një hulumtim ka zbuluar se regjistri zgjedhor i Serbisë përfshin mbi 115 mijë qytetarë me adresë në Kosovë, duke shënuar një shtim prej mbi njëzet mijë votuesish krahasuar me zgjedhjet e kaluara. Në ciklin e mëparshëm parlamentar, në fund të vitit 2023, numri i tyre ishte 94.161.
Zoran Spasiq nga fshati Rubofc pranë Lipjanit, ku janë regjistruar 527 votues, vlerëson se numri i tyre në të vërtetë është më i vogël për shkak të shpërnguljeve dhe rasteve të vdekjeve, dhe me gjasë lista nuk është përditësuar. Gjatë shqyrtimit të regjistrit janë vërejtur edhe raste të përsëritjes së emrave, gabime drejtshkrimore dhe të dhëna të paplota.
Përfaqësues të opozitës në komisionin përkatës paralajmërojnë se baza e të dhënave është e parregullt dhe lë hapësirë për manipulime, ndërkohë që ministritë përgjegjëse nuk japin përgjigje për këto parregullsi. Nga ana tjetër, autoritetet në Serbi pretendojnë se regjistri është i saktë dhe më i përditësuari deri më tani, kurse misioni vëzhgues ODIHR i OSBE-së i bën thirrje Serbisë ta përditësojë listën.
