Rritet me 7.3% qarkullimi industrial në Maqedoninë e Veriut
Ku po shënohet rritja më e madhe e qarkullimit në industrinë maqedonase dhe cili sektor pësoi rënie të thellë në prill?
SHKUP — Qarkullimi në industrinë e Maqedonisë së Veriut ka regjistruar një rritje prej 7.3 përqind në prill të vitit 2026, krahasuar me të njëjtin muaj të vitit paraprak. Sipas statistikave zyrtare, kjo rritje është udhëhequr nga tregu i huaj ku qarkullimi u rrit me 8.7 përqind, ndërsa në tregun vendor u shënua një rritje prej 4.5 përqind.
Në ndarjen sipas grupeve kryesore, produktet kapitale shënuan rritjen më të lartë prej 12.7 përqind, të ndjekura nga prodhimet jo të qëndrueshme për konsum me 4.5 përqind dhe produktet intermediare me 3.4 përqind. Në krahun tjetër, prodhimet e qëndrueshme për konsum të gjerë pësuan një rënie prej 3.4 përqind.
Sektorët e veçantë treguan performancë të larmishme, ku prodhimi i makinerive u rrit me 43.7 përqind dhe produktet e duhanit me 26.3 përqind. Megjithatë, industria e përpunimit të lëkurës pësoi goditjen më të rëndë, duke shënuar një rënie të qarkullimit prej 26.9 përqind krahasuar me vitin paraprak.
Në terma afatshkurtër, qarkullimi i prillit shënoi një rënie prej 1.8 përqind krahasuar me muajin mars të vitit 2026. Ndërkaq, për periudhën katërmujore janar–prill të këtij viti, qarkullimi i përgjithshëm industrial në vend tregon një rritje minimale prej vetëm 0.2 përqind krahasuar me të njëjtën periudhë të vitit 2025.
Burim: Portalb
— Redaksia ZHURMA