Si do të ndryshojnë rregullat e kalimit të kufirit për fëmijët dhe VIP-at?

TIRANË — Këshilli i Ministrave ka miratuar një paketë të re rregullash që riformaton procedurat e verifikimit në pikat kufitare të Shqipërisë, duke shfuqizuar aktet e viteve 2016 dhe 2023. Vendimi i ri synon përafrimin me "Kodin e Kufijve Shengen" të BE-së, duke vendosur standarde të qarta për kalimin e të miturve, VIP-ave dhe mjeteve të transportit.

Pjesa më kritike e vendimit përqendrohet tek fëmijët nën 18 vjeç. Të miturit nën 16 vjeç mund të udhëtojnë vetëm të shoqëruar nga një i rritur, me një deklaratë noteriale të nënshkruar nga të dy prindërit — ose nga prindi me kujdestari ligjore. Deklarata duhet të jetë në shqip dhe anglisht nëse është hartuar jashtë vendit.

Për grupmoshën 16-18 vjeç, lejohet udhëtimi pa shoqërues, por kërkohet deklaratë noteriale nga prindërit që përcakton adresën e pritësit dhe garanton mosbraktisjen. Në rast divorci, shoqëruesi duhet të ketë leje nga të dy prindërit ose vendim gjyqësor për kujdestari, i cili regjistrohet në sistemin elektronik TIMS.

Policia Kufitare ka kompetenca të zgjeruara për të bllokuar kalimin nëse ka dyshime. Në rast të dyshimit për trafikim ose rrëmbim, kryhet intervistë me shoqëruesin dhe verifikime të dokumenteve. Nëse konstatohet braktisje e të miturit jashtë vendit, njoftohen Prokuroria, Agjencia për Mbrojtjen e Fëmijëve dhe autoritetet ndërkombëtare.

Vendimi parashikon gjithashtu kalim të përshpejtuar për kategori të caktuara. Krerët e shteteve, familjet mbretërore, mbajtësit e pasaportave diplomatike dhe anëtarët e organizatave ndërkombëtare si OKB, BE dhe NATO kalojnë me verifikime minimale. Trupat e NATO-s, punonjësit e kërkim-shpëtimit dhe policia në detyrë kanë prioritet absolut, ndërsa qytetarët që kalojnë kufirin çdo ditë për punë gëzojnë verifikime të thjeshtuara.

Rregullat ndryshojnë edhe sipas mjeteve të transportit. Në autoveture, pasagjerët qëndrojnë brenda gjatë kontrollit dhe zbresin vetëm nëse ka dyshime. Autobusët kontrollohen individualisht në terminale, ndërsa tragetet dhe kroçerat e linjave ndërkombëtare duhet të dorëzojnë listën e pasagjerëve 24 orë para mbërritjes. Avionët kontrollohen vetëm në aeroportin e parë të hyrjes në Shqipëri.

Vendimi i ri synon të rrisë sigurinë dhe të parandalojë trafikimin e fëmijëve, duke vendosur një kornizë të rreptë ligjore për kalimin e kufirit. *Burim: Lajmi.net*
*— Redaksia ZHURMA*