RMV: Nga sot fillojnë trajnimet për motoçikleta deri 125cm³
Kush ka të drejtë të regjistrohet dhe çfarë hapa duhet të ndjekë?
SHKUP — Nga sot, të gjitha autoshkollat e Maqedonisë së Veriut me licencë për kategorinë A1 mund të trajnojnë qytetarët për ngasjen e motoçikletave deri 125 centimetra kub. MPB-ja bëri të ditur se ka finalizuar të gjitha kushtet formale, teknike dhe juridike për fillimin e zbatimit të ndryshimeve ligjore.
Sipas MPB-së, trajnimit mund t'i nënshtrohen qytetarët me të paktën 23 vjet moshë dhe pesë vite leje vozitje. Policia sqaroi se sesioni zgjat katër orë, mbulon tema sigurie dhe kërkon vërtetim mjekësor nga kandidati.
Ndryshimi mbështetet në Rregulloren e re të miratuar nga ministria e brendshme, e cila rregullon trajnimin teorik të detyrueshëm katërorësh për drejtimin e motoçikletave deri 125 cm³, kategoria "A1" me ndërrues automatik dhe fuqi deri në 11 kilovat.
MPB-ja kishte njoftuar më 27 maj se mbajtësit e kategorisë B mund të drejtojnë motoçikleta deri 125 cm³, por vetëm pas trajnimit teorik katërorësh të detyrueshëm. Sot ky kusht bëhet i realizueshëm, me hapjen zyrtare të trajnimeve në autoshkolla.
Provimi profesional për ligjërues, shofer-instruktorë, kontrollorë dhe pyetës do të zhvillohet në ambientet e Ministrisë, konkretisht në Qendrën e Trajnimit në Idrizovë, sipas njoftimit të MPB-së.
Burim: Portalb
— Redaksia ZHURMA