Pse u përplasën Rizvanolli e Haradinaj për energjinë?

PRISHTINË — Ministrja në detyrë e Ekonomisë, Artane Rizvanolli, i është përgjigjur me një status në Facebook ish-kryeministrit Ramush Haradinaj, pas kritikave të këtij të fundit për politikat e energjisë të Qeverisë Kurti. Haradinaj kishte akuzuar Kurtin se ia ka "hapur derën importit të rrymës nga mafia energjetike e kontrolluar nga Serbia".

"E ka hequr taksën prej 100% dhe e ka hapur tregun për mallrat serbe", kishte shkruar Haradinaj. Po ashtu, kishte akuzuar Kurtin se "ka anuluar projektin me ContourGlobalin për ta bërë Kosovën të pavarur energjetikisht nga Serbia" dhe se "ka refuzuar edhe projektin amerikan të gazit".

Rizvanolli e kundërshtoi ashpër. Ajo theksoi se taksën prej 100% ndaj mallrave serbe, Kurti e shndërroi në reciprocitet më 31 mars 2020 — vendim që sipas saj "efektivisht ndaloi importin e mallrave serbe". Shfuqizimi i reciprocitetit, shtoi ajo, ishte vendimi i parë i qeverisë Hoti më 6 qershor 2020, kur AAK-ja e Haradinajt ishte pjesë e koalicionit.

"Është për t'u habitur që z. Haradinaj i ka përzier gjërat", shkroi Rizvanolli. Ajo shtoi se në kohën kur qeveriste Haradinaj, "mallrat serbe kalonin nëpër dhjetëra rrugë ilegale që tash janë mbyllur. Dhe jo veç mallrat, por edhe dinarët, armët e kriminelët".

Për marrëveshjen me ContourGlobal, Rizvanolli tha se u nënshkrua në shkelje të Ligjit të prokurimit publik, me kosto "gati dyfish sa mesatarja botërore". Kompanisë iu garantua fitim "shumë i lartë", ndërsa riskin e mori shteti. "Do të kishim rritje të tarifave për së paku 60%", paralajmëroi ajo.

Rizvanolli e quajti të pavërtetë shifrën se "gjatë vitit 2025 Kosova ka importuar 259 milionë euro energji elektrike". "Shifra reale është e fryrë rreth 1.5 herë", tha ajo. Po ashtu, theksoi se në vitet 2017-19 kur qeveriste Haradinaj, KEK-u kishte prodhuar vetëm 5.2 TWh, 5.1 TWh dhe 5.5 TWh — "rekordet më të ulëta të prodhimit në 10 vitet e fundit".

Për projektin amerikan të gazit, Rizvanolli citoi informata nga MCC se "projekti ka qenë ide e qeverive të mëhershme të Kosovës e jo ide 'amerikane'".

Burim: Koha.net, https://www.koha.net/arberi/akuza-e-kunderakuza-per-energjine-perplasen-rizvanolli-dhe-haradinaj
— Redaksia ZHURMA