Ndalen katër nxënës shqiptarë në Kotorr pas simbolit të shqiponjës

Katër nxënës shqiptarë nga gjimnazi «Naim Frashëri» në Durrës janë ndaluar nga policia në qytetin e Kotorrit në Mal të Zi, pasi kanë bërë simbolin e shqiponjës dykrenare me duar në rrugë më 31 tetor rreth orës 17:30. Të rinjtë dyshohen nga autoritetet malazeze për kundërvajtjen e nxitjes së urrejtjes kombëtare.

Nxënësit ishin pjesë e një udhëtimi turistik drejt Malit të Zi, ku udhëtonin me një autobus dhe një furgon së bashku me mësues shoqërues. Policia e Kotorrit ka ndaluar mjetet dhe ka mbajtur për disa orë në komisariat grupin e nxënësve të mitur dhe mësuesve. Familjarët e tyre i janë drejtuar Ambasadës Shqiptare në Mal të Zi dhe institucioneve arsimore në Durrës për të kërkuar informacion, pasi fillimisht nuk kanë marrë shpjegime për arsyen e ndalimit.

Sipas informacionit zyrtar nga autoritetet malazeze, ngjarja ka nisur kur një grua e moshuar u ka kërkuar të rinjve të ndërprisnin veprimin. Gruaja u është drejtuar atyre në gjuhën malazeze, por nxënësit nuk e kanë kuptuar kërkesën dhe kanë vijuar të bëjnë simbolin. Në vijim, ajo ka njoftuar policinë dhe ka bërë kallëzim me shkrim, duke pretenduar se ishte kërcënuar. Raportimet sqarojnë se tre nga nxënësit kanë bërë gjestin e shqiponjës, ndërsa një tjetër dyshohet se është përfshirë në përplasje me gruan. Pas verifikimeve, pjesa më e madhe e grupit është larguar nga komisariati drejt hotelit, ndërsa katër nxënës dhe një mësuese kanë mbetur në ambientet e policisë.

Sipas informacionit të përcjellë nga autoritetet malazeze, katër nxënësit e ndaluar do të dalin më 1 nëntor përpara gjykatës kompetente, ku do të shqyrtohet çështja e tyre ligjore.