Kush po ushtron presion për largimin e serbëve nga puna në Graçanicë?
Ministri në detyrë për Komunitete dhe Kthim denoncon presionin politik të Beogradit ndaj serbëve që nuk e mbështesin Listën Serbe.
PRISHTINË — Ministri në detyrë për Komunitete dhe Kthim, Nenad Rashiq, ka deklaruar se rreth 20 persona janë larguar nga puna në Graçanicë për shkak të presionit politik të ushtruar nga Beogradi zyrtar ndaj serbëve që nuk e mbështesin Listën Serbe.
Në një intervistë për "Përballje Podcast" në Telegrafi, Rashiq tha se numri i saktë i largimeve nuk dihet, pasi disa raste nuk janë raportuar nga frika e hakmarrjes ndaj familjarëve. "Janë larguar rreth 20 persona nga puna. Numri i saktë nuk dihet, sepse disa nuk kanë raportuar fare nga frika se mund të ketë hakmarrje shtesë ndaj familjarëve të tyre", tha ai.
Rashiq e cilësoi këtë si "veprim brutal" dhe "diktaturë që pa dyshim ekziston për momentin në Beograd". Sipas tij, presioni ndaj serbëve që mendojnë ndryshe është bërë më i organizuar dhe më i ashpër në këtë fushatë zgjedhore, ndërsa qytetarët serbë që mbështesin alternativa të tjera politike po përballen me frikë, shantazh dhe pasiguri.
Ai shtoi se i ka njoftuar ambasadat për këtë presion, por nuk ka marrë përgjigje. Rashiq theksoi se kjo situatë përsëritet në çdo proces zgjedhor dhe se niveli i ashpërsisë ndaj qytetarëve serbë është vazhdimisht në rritje.
Burim: Telegrafi
— Redaksia ZHURMA